回港之後，小春接拍無綫劇集《鐵嘴銀牙》，丁丁也剛好有幾個月假期，可以雙雙留港培養感情，丁丁說：「他傳短訊給我，一起吃飯、看戲，但我一向都知佢花（心），起初沒有什麼寄望，只不過那時候悶悶地。」父母有反對女兒與小春拍拖嗎？「老竇都唔知我下一個係邊個，是旦啦，同你食完呢餐飯，都唔知下一次仲係咪你！」就在半信半疑、半推半就、半夢半醒之間，小春與丁丁開始了。
雖然小春戀愛經驗豐富，但丁丁很快便發現，原來男友「唔識拍拖」，要她不斷循循善誘。「拍完拖，返到屋企打給我，女仔會覺得好基本，但他不會，要我打電話給他：『你返到屋企未呀？』『返咗喇，沖完涼！』『做乜唔打俾我？』『點解要打俾你呀？』『安全問題嘛！』『啊，咁呀，好啦！』然後收線，我再打給他：『做乜唔講拜拜？』『乜要講拜拜㗎？』『咁我點知你收線啫！』『啊，咁拜拜啦！』」她嘆了大大口氣：「一步步咁教，真的好累！又好似我一個女仔在家，永遠不會問我有沒有吃飯，自己就食到好飽！我話：『你食完嘢，咁有冇問我食咗飯未吖？』『咁你食咗飯未呀？』（丁丁晦氣地答：）『食咗飯喇，唔該你！』『咁點呀，叫咗人問，而家你又唔答！』之後就為了這件事吵架！」
第一個情人節
當然，女生最重視的節日，又是一條又一條的「導火線」。「第一年過情人節，他帶了我去日本滑雪，我早已預備一份禮物，送完之後，看見他的表情有點愕然，『吓，我冇禮物㗎？』『有有有，我喺香港訂咗喇！』『乜嚟㗎？』『嗯…耳環囉！』『耳環要訂？！』我知道他根本沒有，只是回港後立即補送，對不對？」小春無奈地點頭，「唔」了一下。
為討女友歡心，小春實已出盡全力，不時炮製驚喜。「他的surprise，每次都搞到我好嬲，譬如我去廣州拍戲，他明明想突擊探班，但偏偏說要跟朋友去泰國玩，我說等我拍完一齊去得唔得，他卻說要去曬太陽，完全不懂鋪排前面劇情，我寧願他跟我說明天飛來探班，起碼我都可以開心兩日，現在卻嬲了整整一晚，就算第二天真的來了，心情都起唔返到果個位。」有時候，小春往外地拍戲，跟丁丁說過幾天回來，之後立即關機，第二天一大清早便在家裏出現，「Surprise!」可惜橋段重複又重複，早被精靈的丁丁識破：「一早知啦，成日呃人，好無聊！」
言若有憾，心實喜之。經過丁丁的特訓以後，今日的小春會定時定候問候女友：「有沒有吃飯？」、「辛不辛苦？」，最重要是，他學會了講「拜拜」。「他變了現在這樣，令我好感動！」小春也認定丁丁是他的終生伴侶，去年六月女友生日，他暗中通知二、三十位好友，直踩香閨「迫婚」。「入到去、見到她，已經開始想喊，一跪低說：『嫁給我，好嗎？』不知何故喊到好淒涼！」第一次見小春為自己落淚，丁丁居然興奮得呱呱大叫：「傻仔呀，你終於喊喇，哈哈哈……」但小春的哭聲仍然未止，弄得在旁的丁爸爸（應采兒原名丁文）也忍不住代女兒應允：「得喇得喇，我嫁俾你啦！」最後，自然是大團圓結局。
